اسلام آباد (لارڈ میڈیا): وفاقی آئینی عدالت کی پہلی سالگرہ کے موقع پر چیف جسٹس امین الدین خان نے کہا ہے کہ عدالت نے ایک سال میں 9 ہزار مقدمات کے فیصلے کیے، جو کسی بھی عدالت کی جانب سے دیے گئے فیصلوں کی تعداد میں سب سے زیادہ ہیں۔ تقریب سے خطاب کرتے ہوئے انہوں نے کہا کہ ہم نے وکلا کے دلائل کا وقت مقرر کر رکھا ہے جو دنیا بھر میں رائج ہے۔

چیف جسٹس امین الدین خان نے ستمبر 24 کو مقدمات کی جلد سماعت اور زیر التوا کیسز نمٹانے کے لیے وکلا کے دلائل کا دورانیہ 10 منٹ تک محدود کیا تھا۔ انہوں نے کہا کہ کمرہ عدالت میں اسٹاپ واچ نصب کی گئی ہے جو وکیل کے لیے مقررہ 10 منٹ مکمل ہونے پر بیپ کی آواز دیتی ہے۔

چیف جسٹس نے آئینی عدالت کی کارکردگی پر بات کرتے ہوئے کہا کہ کبھی بھی اپنے کام سے مطمئن نہیں ہونا چاہیے اور ہر وقت بہتری کی کوشش کرنی چاہیے۔ انہوں نے آئینی عدالت کا ایک سال مکمل ہونے پر تمام وکلا اور ججز کو مبارکباد پیش کی۔

اس موقع پر یادگاری ڈاک ٹکٹ کی رونمائی اور ای کورٹ کا افتتاح بھی کیا گیا۔ آئینی عدالت کے اہم فیصلوں کے اردو ترجمے پر مبنی کتاب کا اجرا بھی ہوا۔ تقریب میں آئینی عدالت کے ججز، اٹارنی جنرل، پاکستان بار اور سپریم کورٹ بار ایسوسی ایشن کے عہدیداران نے شرکت کی۔

وفاقی آئینی عدالت کا قیام نومبر 2025 میں 27ویں آئینی ترمیم کے بعد عمل میں لایا گیا تھا اور نومبر 13 کو جسٹس امین الدین کو اس عدالت کا پہلا چیف جسٹس مقرر کیا گیا تھا۔