اسلام آباد (لارڈ میڈیا): حکومت نے مسلسل تیسرے روز پیٹرولیم مصنوعات کی قیمتوں میں کمی کا اعلان کر دیا ہے۔ اوگرا کی جانب سے جاری نوٹیفکیشن کے مطابق پیٹرول کی قیمت میں 3 روپے فی لیٹر کی کمی کی گئی ہے، جس کے بعد اس کی نئی قیمت 332 روپے فی لیٹر مقرر کی گئی ہے۔ ہائی اسپیڈ ڈیزل کی قیمت میں بھی 4 روپے فی لیٹر کی کمی کی گئی ہے، جس کے بعد ڈیزل کی نئی قیمت 360 روپے فی لیٹر ہو گئی ہے۔

یہ نوٹیفکیشن 13 نومبر تک کے لیے جاری کیا گیا ہے۔ مسلسل تین دن میں پیٹرول کی قیمت میں مجموعی طور پر 14 روپے فی لیٹر جبکہ ڈیزل کی قیمت میں 18 روپے کی کمی واقع ہوئی ہے۔ گزشتہ روز بھی حکومت نے پیٹرول کی قیمت میں 8 روپے اور ڈیزل کی قیمت میں 7 روپے فی لیٹر کمی کا اعلان کیا تھا۔

قابل ذکر ہے کہ ڈیزل کی قیمت 3 اپریل کو 520 روپے 35 پیسے فی لیٹر کی بلند ترین سطح پر تھی جو اب کم ہو چکی ہے۔ امریکا اور ایران کے درمیان 28 فروری کو جنگ کے آغاز کے بعد ڈیزل کی قیمت میں اضافہ ہوا تھا۔

پیٹرول کی قیمت بھی مارچ کے پہلے ہفتے میں 266 روپے فی لیٹر سے بڑھنا شروع ہوئی اور 3 اپریل کو 458 روپے 41 پیسے فی لیٹر کی بلند ترین سطح پر پہنچ گئی تھی۔ 13 ستمبر کو وزیراعظم شہباز شریف نے موٹر سائیکلوں، رکشوں اور 800 سی سی تک کی گاڑیوں کے مالکان کے لیے ریلیف اسکیم کا اعلان کیا تھا تاکہ عالمی منڈی میں تیل کی قیمتوں کے بوجھ کو کم کیا جا سکے۔

مارچ کے آغاز سے حکومت ہر ہفتے پیٹرولیم مصنوعات کی قیمتوں میں ردوبدل کر رہی تھی۔ مشرقِ وسطیٰ میں جاری تنازع کے باعث تیل کی سپلائی متاثر ہونے کے خدشات کے پیش نظر ایندھن کی بچت کے اقدامات بھی کیے گئے۔