لاہور (لارڈ میڈیا): شالیمار ایکسپریس کے انجن میں خواجہ سراؤں کو سفر کرنے اور سونے کی اجازت دینے پر ریلوے پولیس نے ٹرین ڈرائیور، اسسٹنٹ ڈرائیور اور دو خواجہ سراؤں کو گرفتار کرلیا ہے۔ یہ واقعہ اس وقت سامنے آیا جب سوشل میڈیا پر خواجہ سراؤں کی ویڈیو وائرل ہوئی، جس کے بعد ریلوے پولیس نے فوری کارروائی کی۔

ایف آئی آر کے مطابق، خواجہ سراؤں نے ساہیوال سے رائے ونڈ تک شالیمار ایکسپریس کے انجن میں سفر کیا، اور اس دوران ایک خواجہ سرا نے اسسٹنٹ ڈرائیور کی نشست پر لیٹ کر آرام کیا۔ ریلوے پولیس نے واقعے میں ملوث ٹرین ڈرائیور امتیاز، اسسٹنٹ ڈرائیور ثقلین حیدر اور خواجہ سراؤں علی جان اور حانیہ کو گرفتار کرلیا ہے۔

پولیس کے مطابق، ٹرین کے عملے پر الزام ہے کہ انہوں نے خواجہ سراؤں کو انجن میں سفر کرنے اور قیام کرنے کی اجازت دی، جس کی ویڈیو سوشل میڈیا پر وائرل ہوئی۔ ریلوے پولیس نے مقدمہ درج کرلیا ہے اور معاملے کی مزید تحقیقات جاری ہیں۔