لاہور (لارڈ میڈیا): لاہور اور ملتان شدید سموگ اور فضائی آلودگی کی لپیٹ میں ہیں، جس سے شہریوں کو مشکلات کا سامنا ہے۔ لاہور میں فضائی آلودگی کی اوسط شرح 344 سے تجاوز کر گئی، جس کے باعث یہ دنیا کے آلودہ ترین شہروں میں شامل ہوگیا ہے۔ پیراگون سوسائٹی میں ایئر کوالٹی انڈیکس 671 جبکہ ماڈل ٹاؤن میں 561 ریکارڈ کیا گیا۔

محکمہ موسمیات کے مطابق لاہور میں بارش کے امکانات 10 فیصد ہیں، ہوا میں نمی کا تناسب 75 فیصد جبکہ ہوا کی رفتار 3 کلومیٹر فی گھنٹہ ہے۔ درجہ حرارت 18 سے 29 ڈگری سینٹی گریڈ رہنے کا امکان ہے۔

ملتان میں بھی سموگ کی صورتحال تشویشناک ہے، جہاں فضائی آلودگی کی اوسط شرح 507 پارٹیکولیٹ میٹرز ریکارڈ کی گئی۔ شہری سموگ کے باعث شدید مشکلات کا شکار ہیں۔

جنوبی پنجاب میں آئندہ دو سے تین روز کے دوران بارشوں کی پیشگوئی کی گئی ہے، جس سے سموگ کی شدت میں کمی کی امید ہے، تاہم سردی میں اضافے کا امکان بھی ظاہر کیا گیا ہے۔

طبی ماہرین نے شہریوں کو غیر ضروری طور پر باہر نکلنے سے گریز، ماسک کے استعمال اور احتیاطی تدابیر اختیار کرنے کی ہدایت کی ہے۔