انطالیہ (لارڈ میڈیا): وزیراعظم شہباز شریف نے موسمیاتی تبدیلیوں کے اثرات سے نمٹنے کے لیے عالمی یکجہتی اور منصفانہ اقدامات کی ضرورت پر زور دیا ہے۔ اقوام متحدہ کی موسمیاتی تبدیلی کانفرنس کوپ 31 میں قومی بیان دیتے ہوئے، انہوں نے کہا کہ پاکستان ماحول دوست اقدامات کے ذریعے مثال قائم کر رہا ہے۔ انہوں نے پانی کو ہتھیار کے طور پر استعمال نہ کرنے کی اہمیت پر بھی زور دیا۔

وزیراعظم نے 2025 میں آنے والے تباہ کن سیلاب کا ذکر کرتے ہوئے بتایا کہ بونیر میں ایک نوجوان کا پورا گاؤں اس کی شادی سے چند روز قبل سیلابی ریلے کی نذر ہوگیا۔ انہوں نے کہا کہ موسمیاتی تبدیلیوں کے اثرات پاکستان سمیت ترقی پذیر ممالک کو بھگتنا پڑ رہے ہیں۔

شہباز شریف نے 2022 کے سیلاب کا حوالہ دیتے ہوئے بتایا کہ اس وقت پاکستان کا ایک تہائی حصہ زیر آب آگیا تھا، جس سے 3 کروڑ 30 لاکھ افراد متاثر ہوئے اور معاشی نقصانات 30 ارب ڈالر سے تجاوز کر گئے۔ انہوں نے کہا کہ عالمی یکجہتی کا مطلب عملی اقدام ہونا چاہیے۔

انہوں نے ترک صدر رجب طیب اردوان اور ترک عوام کا شکریہ ادا کیا، جنہوں نے 2010 اور 2022 کے سیلابوں کے دوران پاکستان کا ساتھ دیا۔ انہوں نے چشمہ فائیو نیوکلیئر پاور پلانٹ کے حوالے سے بھی بات کی، جو 1,200 میگاواٹ صاف بجلی پیدا کرے گا۔

شہباز شریف نے کہا کہ پاکستان نے دو برسوں میں ترسیلی شمسی توانائی کی صلاحیت میں 20 گیگاواٹ سے زیادہ اضافہ کیا ہے۔ انہوں نے زور دیا کہ قومی سطح پر کی گئی کوششیں منصفانہ عالمی ردعمل کا متبادل نہیں ہوسکتیں۔