راولپنڈی (لارڈ میڈیا) : پاکستان تحریک انصاف کے بانی عمران خان کو اڈیالہ جیل سے اسپتال منتقل کیے جانے کا امکان ہے۔ جیل ذرائع کے مطابق ان کی صحت کے پیش نظر آئندہ چند روز میں یہ اقدام کیا جا سکتا ہے۔

گزشتہ روز عمران خان کے وکلا سردار لطیف کھوسہ اور بیرسٹر سلمان صفدر نے ان سے چار گھنٹے طویل ملاقات کی۔ ملاقات میں ان کی صحت، قانونی مقدمات اور سیاسی امور پر تفصیلی گفتگو ہوئی۔

ذرائع کا کہنا ہے کہ عمران خان نے ملک میں نئے صوبے بنانے کی تجویز کی حمایت کی ہے۔ ملاقات کے بعد وکلا نے میڈیا سے گفتگو میں اس ملاقات کی تصدیق کی۔

پمز اسپتال میں طبی معائنے کی تیاریوں اور وکلا کی ملاقات کو سیاسی حلقے اہم پیشرفت قرار دے رہے ہیں۔ اس سے سیاسی ڈیڈلاک کے خاتمے کے امکانات بڑھ سکتے ہیں۔

ذرائع کے مطابق آنے والے دنوں میں قانونی ٹیم اور دیگر فریقین کے درمیان رابطے مزید تیز ہونے کا امکان ہے، جو ملکی سیاسی استحکام پر اثر انداز ہو سکتے ہیں۔