اسلام آباد (لارڈ میڈیا): سابق وفاقی وزیر فواد چوہدری نے دعویٰ کیا ہے کہ 28ویں آئینی ترمیم 15 جنوری سے پہلے لائی جا سکتی ہے۔ انہوں نے کہا کہ ترمیم کے لیے ریفرنڈم کی تجویز بھی زیر غور ہے، جس سے حاصل عوامی منظوری کو آئینی ترمیم کے لیے استعمال کیا جا سکتا ہے۔

فواد چوہدری نے اے آر وائی کے پروگرام ’دی رپورٹرز‘ میں کہا کہ وکلا کے دو گروپ ترمیمی مسودے پر کام کر رہے ہیں، جن میں فروغ نسیم اور سابق اٹارنی جنرل منصور اعوان شامل ہیں۔ انہوں نے کہا کہ مسلم لیگ (ن) اور پیپلز پارٹی اس اقدام کے لیے تاحال تیار نہیں ہیں۔

گزشتہ روز اڈیالہ جیل میں عمران خان سے وکلا کی ملاقات کا ذکر کرتے ہوئے بتایا گیا کہ 28ویں آئینی ترمیم پر بھی تبادلہ خیال ہوا، تاہم تفصیلات نہیں بتائی گئیں۔

مسلم لیگ (ن) کے رہنما بیرسٹر عقیل رانا نے کہا کہ حکومت نے آئینی ترمیم پر باضابطہ کام شروع نہیں کیا اور کسی فیصلہ کی صورت میں اتحادی جماعتوں کو اعتماد میں لیا جائے گا۔

یاد رہے کہ 28ویں آئینی ترمیم کی بحث نومبر 2025 میں 27ویں ترمیم کی منظوری کے بعد شروع ہوئی تھی، جب وزیراعظم شہباز شریف نے ایم کیو ایم پاکستان کو آئندہ ترمیم میں بلدیاتی نظام کو آئینی تحفظ دینے کی یقین دہانی کرائی تھی۔