انطالیہ (لارڈ میڈیا) وزیراعظم شہباز شریف نے کہا ہے کہ پاکستان کو 2035 تک کم کاربن توانائی کے منصوبوں کے لیے 138 ارب ڈالر جبکہ کوئلے سے بجلی کی پیداوار کو شمسی توانائی سے تبدیل کرنے کے لیے مزید 50 ارب ڈالر درکار ہوں گے۔ انہوں نے ترقی پذیر ممالک کے موسمیاتی اہداف کے حصول کے لیے آسان شرائط پر عالمی مالی معاونت اور سستی جدید ٹیکنالوجی کی منتقلی پر زور دیا۔

وزیراعظم نے اقوام متحدہ کی موسمیاتی کانفرنس کے 31ویں اجلاس میں ترکیہ کے شہر انطالیہ میں خطاب کرتے ہوئے کہا کہ ترقی پذیر ممالک کے موسمیاتی عزائم عالمی مالی معاونت کی فراہمی سے ہی پورے ہوسکتے ہیں۔ انہوں نے کہا کہ پاکستان گزشتہ دو برس کے دوران صاف توانائی کی جانب نمایاں پیش رفت کر چکا ہے۔

وزیراعظم نے بتایا کہ اس عرصے میں گھروں اور کاروباری مراکز کی چھتوں پر تقریباً 22 ہزار میگاواٹ شمسی توانائی کی پیداواری صلاحیت کا اضافہ ہوا ہے۔ انہوں نے اس کو ایک خاموش انقلاب قرار دیتے ہوئے کہا کہ سستی، قابل اعتماد بجلی کے حصول کے لیے شمسی توانائی کا رخ کیا گیا ہے۔

شہباز شریف نے پاکستان کے جوہری توانائی پروگرام کا ذکر کرتے ہوئے بتایا کہ انطالیہ روانگی سے قبل انہوں نے ملک کے ساتویں جوہری بجلی گھر کے ایک اہم حصے کا افتتاح کیا، جو 1200 میگاواٹ بجلی کا اضافہ کرے گا۔ انہوں نے کہا کہ توانائی کے شعبے کے بعد ٹرانسپورٹ کے شعبے میں بھی تبدیلی جاری ہے۔

انہوں نے بتایا کہ حکومت کی حال ہی میں متعارف کرائی گئی آٹو پالیسی کے تحت 2030 تک الیکٹرک گاڑیوں کا حصہ 30 فیصد تک پہنچانے کا ہدف مقرر کیا گیا ہے۔ انہوں نے کہا کہ حکومت سرکاری بسوں اور موٹر سائیکلوں کو الیکٹرک بنانے کا ارادہ رکھتی ہے۔

وزیراعظم نے خبردار کیا کہ مناسب مالی وسائل کے بغیر توانائی کے شعبے میں جاری تبدیلی کو برقرار رکھنا ممکن نہیں ہوگا۔ انہوں نے کہا کہ عالمی برادری کو چاہیے کہ موسمیاتی تبدیلی سے نمٹنے کے اقدامات ترقی پذیر ممالک کی معاشی مشکلات میں مزید اضافے کا سبب نہ بنیں۔