اسلام آباد (لارڈ میڈیا): پاکستان تحریک انصاف کی سینیٹر مشعال یوسفزئی نے دعویٰ کیا ہے کہ ان کی جماعت کے مشکل دن اب کم ہو رہے ہیں اور پاکستان پیپلز پارٹی اور مسلم لیگ ن کی مشکلات بڑھنے والی ہیں۔ سینیٹر مشعال یوسفزئی نے سوشل میڈیا پلیٹ فارم ایکس پر کہا کہ پی ٹی آئی کے ساتھ جو کچھ ہونا تھا وہ ہو چکا ہے، اب ان کے دن بہتر ہو رہے ہیں جبکہ پیپلز پارٹی اور مسلم لیگ ن کی مشکلات میں اضافہ ہوگا۔ انہوں نے بتایا کہ عمران خان کی دو بہنوں کو غیر قانونی قید سے رہا کر دیا گیا ہے اور اب تمام رہنماؤں کو اتحاد کے ساتھ اپنے قائد کے لیے مشکلات میں آسانیاں پیدا کرنی ہیں۔

سینیٹر مشعال یوسفزئی نے بانی پی ٹی آئی عمران خان کی اسیری اور صحت سے متعلق سنگین خدشات کا اظہار کیا۔ انہوں نے الزام عائد کیا کہ عمران خان کو مبینہ قیدِ تنہائی میں رکھا گیا ہے جہاں اخبار، ٹی وی یا ملاقات کی سہولیات محدود ہیں۔ ان کی آنکھ متاثر ہے اور بلڈ پریشر بڑھنے کا مسئلہ درپیش ہے۔ ڈاکٹرز جیل میں دوسری آنکھ کا آپریشن کرنے سے انکاری ہیں۔

انہوں نے مزید کہا کہ عمران خان کی اہلیہ بھی قید میں ہیں، جن سے خاندان والوں کی ملاقات اور ضروری اشیاء کی فراہمی پر پابندیاں ہیں۔ عمران خان کو اپنے بیٹوں سے فون کال پر بات کرنے کی اجازت نہیں دی جا رہی۔ ان سخت حالات کے باوجود، عمران خان جیل میں وکلا سے ملاقاتوں میں اپنے عزم پر قائم ہیں۔

پی ٹی آئی سینیٹر نے کہا کہ عمران خان نے قوم کی خاطر مشکلات برداشت کیں اور وہ ملک و عوام کے مفاد کے لیے بامقصد بات چیت پر آمادہ ہیں۔ پی ٹی آئی اس بحران کا سیاسی حل نکالے گی اور عدالتوں کے ذریعے اپنے قائد کو رہا کروائے گی، جس کے لیے نظام میں تبدیلی ناگزیر ہے۔