نیو یارک (لارڈ میڈیا): معروف ٹیکنالوجی کمپنی اینتھروپک کے چیف ایگزیکٹیو ڈاریو اموڈی نے دعویٰ کیا ہے کہ مصنوعی ذہانت (اے آئی) کی تیز رفتار ترقی کے باعث اگلے 10 سال میں کینسر جیسی پیچیدہ بیماریوں کا خاتمہ ممکن ہوسکتا ہے۔ اموڈی کے مطابق ان کی کمپنی کے اے آئی سسٹم ‘کلاڈ’ کے ذریعے کینسر، الزائمر، دل کی بیماریاں اور ذہنی امراض ماضی کا قصہ بن سکتے ہیں۔

انہوں نے کہا کہ ٹیکنالوجی کے درست استعمال سے انسانیت کے ہزاروں سال کے مسائل کا حل ممکن ہے۔ ان کا کہنا تھا کہ اے آئی حیاتیاتی تحقیق، نئی ادویات کی تیاری اور طبی دریافتوں کے عمل کو غیر معمولی رفتار دے سکتی ہے۔

تاہم، شعبہ طب سے وابستہ کئی سائنس دانوں نے ان پیش گوئیوں کو سخت تنقید کا نشانہ بناتے ہوئے مسترد کیا ہے۔ ان کا کہنا ہے کہ مصنوعی ذہانت کی مدد سے ابتدائی مرحلے میں ممکنہ ادویاتی مرکبات کی شناخت کا عمل تیز ہوسکتا ہے، لیکن دوا کی تیاری کے باقی ضروری مراحل بدستور ضروری رہیں گے۔

ماہرین کے مطابق کسی ممکنہ دوا کو تجربہ گاہوں، جانوروں پر تجربات اور انسانوں پر طبی آزمائشوں سے گزارنا ضروری ہوتا ہے تاکہ اس کی افادیت اور حفاظت کا تعین کیا جاسکے۔ عام طور پر کسی نئی دوا کی تیاری اور منظوری کے پورے عمل میں 10 سے 12 سال لگ سکتے ہیں۔